Skip This
लामो समयदेखि बन्द रहेको व्याँस गाउँपालिकास्थित सीमा प्रशासन कार्यालय सञ्चालनमा आएको छ। कार्यालय पुन: खुला भएसँगै सदरमुकाम खलंगामा बसेर सेवा दिइरहेका कर्मचारी व्याँस पुगेका छन्।
व्याँसको कार्यालय खुलेसँगै सीमा प्रशासन कार्यालय दार्चुलाले दुई ठाउँबाट सेवा दिन थालेको छ। अब छांगरू र सदरमुकाम खलंगास्थित तिंकरखेडाबाट सीमा प्रशासन कार्यालयले सेवा दिनेछ।
व्याँस गाउँपालिका– १ छांगरू तिंकरका स्थानीय बसाइँसराइ गरेसँगै सीमा प्रशासन कार्यालयका दुई कर्मचारी सेवा दिन छांगरू पुगेका हुन्। माथिल्लो निकायलाई जानकारी गराउने, स्थानीयलाई सिफारिस दिने जिम्मेवारी पाएको निकाय वर्षौँदेखि छांगरू उक्लिन सकेको थिएन।
अहिले खरिदार कल्याणसिंह कुँवर नेतृत्वमा दुई कर्मचारी पुगेर कार्यालय खुला गरिएको निमित्त कार्यालय प्रमुख मानबहादुर खडायतले बताए। कार्यालयमा एक कार्यालय सहयोगी छन्।
सीमाको सुरक्षा अवस्था, स्थानीयको नागरिकता र छिमेकी मुलुक जान पास दिनेलगायत काम गर्न ०३४ मा यो कार्यालय खोलिएको थियो। छांगरूमा रहेको सीमा प्रशासन कार्यालयमा कर्मचारी नजाने भएपछि स्थानीय खलंगामै आएर सेवा लिने गरेका थिए। विगतमा जिल्ला प्रशासन कार्यालयसँगै रहेको सीमा प्रशासन गत वर्षबाट तिंकरखेडामा छुट्टै कोठा भाडामा लिएर कार्यालय खोलिएको थियो ।
सौका समुदायको दुवैतर्फ बसाइ रहेका कारण घर भाडामा लिएर सेवा दिने काम भइरहेको उनले बताए। सीमा प्रशासन कार्यालय दार्चुलामा सातजनाको दरबन्दी रहेको छ।
विगतमा छांगरूमा रहेको सीमा प्रशासन कार्यालयका कर्मचारीले सीमा क्षेत्रमा भइरहेका गतिविधि नियमित रूपमा जिल्ला प्रशासन कार्यालयलाई अवगत गराउने गरेको थियो। छांगरू कालापानीभन्दा झन्डै १४ किलोमिटर तल पर्छ।
