अहिले राजस्व कम उठ्नुको कारण के हो ?
राजस्व कम उठ्नुमा एउटा मात्रै कारण छैन । आन्तरिक र बाह्य दुवै कारण यसमा देखिन्छन् । बाह्य क्षेत्रमा परेको चापका कारण सरकारले लिएको केही नीतिगत कदमले गर्दा राजस्व संकुचनमा परेको हो । बाह्य क्षेत्रको दबाब कम गर्न आयातमा कडाइ गरिएको थियो, जसले भन्सार राजस्व निकै कम संकलन भयो । यद्यपि आन्तरिक राजस्व पोहोरकै बराबर पुग्न लागेको छ ।
त्यसबाहेक घरजग्गा कित्ताकाटमा पछिल्लो समय लिइएको नीतिगत कारणले पुँजीगत लाभकर संकलनमा असर परेको छ । साथै, आन्तरिक माग नै कमजोर भएपछि निजी क्षेत्रले तिर्ने राजस्वमा कमी आउनु स्वाभाविक हो ।
राजस्व बढाउन सरकार के गर्दै छ ?
सरकारले यसअघि लिएका आयात कडाइको व्यवस्था हटाइसकेको छ । राजस्व संकलन गर्ने निकायमा सेवाप्रवाह चुस्त बनाउँदै गइरहेका छौँ । त्यस्तै आगामी असारसम्म साधारण अवस्थामा पुग्ने गरी कार्ययोजना नै बनाएर अघि बढेका छौँ । राजस्व चुहावट हुन सक्ने सम्भावित क्षेत्रमा कडाइ गरिएको छ ।
आगामी बजेटले राजस्व गिरावटको समस्यालाई कसरी सम्बोधन गर्न सक्छ ?
आगामी बजेटमा आउने राजस्व नीति तथा कार्यक्रममा करको दायरा विस्तार गर्ने गरी तर्जुमा गर्दै छौँ । यद्यपि असारपछि सामान्य अवस्थामा पुग्छौँ भन्ने हाम्रो अनुमान पनि छ । साथै निजी क्षेत्रको माग र अहिलेको समस्यालाई सम्बोधन गर्ने उद्देश्यले राजस्व नीति तथा कार्यक्रम तर्जुमाको तयारी भइरहेको छ ।