- वि.सं २०८१ बैशाख ७ शुक्रबार
भारतको पश्चिमबंगालमा अलपत्र परेका सर्लाहीको हरिवनका युवकको उद्धार गरिएको छ ।
सर्लाहीको हरिवन नगरपालिका– ५, घुर्कौली घर भएका रामबहादुर तामाङलाई भारतको पश्चिम बंगालको दक्षिण २४ परगना जिल्लाबाट उद्धार गरी सर्लाही ल्याइएको छ ।
शुक्रबार सर्लाही ल्याइपुर्याइएका तामाङलाई आफन्तको जिम्मा लगाइएको इलाका प्रहरी कार्यालय हरिवनले जनाएको छ ।
भारतीय महावाणिज्य दूतावासको समन्वयमा भारतको कोलकातामै रहेको जानकी नेपाली धार्मिक संघले उनको उद्धार गरेको हो ।
मानसिक रूपमा अस्वस्थ तामाङ लगभग सात वर्षदेखि बेपत्ता थिए । बेपत्ता केही दिनअघि भारतको कोलकातामा गम्भीर अवस्थामा अलपत्र फेला परेपछि नयाँ पत्रिकाको अनलाइन संस्करणबाट सामाचार सम्प्रेषण भएको थियो ।
लगत्तै पहल गरेर उनको उद्धार गरेको हरिवन– ५ का वडाध्यक्ष नागेन्द्र साहले बताए । इलाका प्रहरी कार्यालयमा वडाध्यक्ष साहको समेत रोहबरमा तामाङलाई आफन्तको जिम्मा लगाइएको हो ।
नेपाली धार्मिक संघको सम्पर्क विभागका प्रमुख हितबहादुर खड्काले तामाङ रहेको स्थानमा पुगेर उद्धार गरी शुक्रबार सर्लाही ल्याइपुर्याएका हुन् । उनले तामाङको उद्धारमा सहयोग पुर्याउने सबै प्रति आभार प्रकट गरे ।
तामाङका आमाबुबाको केही वर्षअघि नै मृत्यु भइसकेको छ । उनको भाइ केही वर्षअघि काम खोज्दै पोखरा गएको र अहिलेसम्म नफर्किएको स्थानीय बताउँछन् ।
