धनकुटामा सञ्चालन भएको प्रादेशिक औद्योगिक व्यापार मेला तथा कृषि प्रदर्शनी, एभोकाडो एवं पाँचौँ धनकुटा महोत्सवमा सात करोड रुपैयाँभन्दा बढीको आर्थिक कारोबार भएको छ ।

माघ ६ गतेदेखि १९ गतेसम्म सञ्चालन भएको महोत्सवमा अनुमान गरिएभन्दा बढी आर्थिक कारोबार भएको आयोजकले जनाएको छ । धनकुटा उद्योग वाणिज्य संघको आयोजनामा भएको महोत्सवमा आयोजकले करिब पाँच करोडबराबरको आर्थिक कारोबार हुने अनुमान गरेको थियो । तर, महोत्सवमा अनुमान गरिएभन्दा बढी कारोबार भएको संघका अध्यक्ष विजयसन्तोषी राईले बताए ।

महोत्सवको एक लाख व्यक्तिले अवलोकन गर्ने अनुमान गरिए पनि एक लाख ५० हजारले अवलोकन गरेको अध्यक्ष राईले बताए । एक सय ८३ स्टल राखिएको महोत्सवमा कृषि र घरेलु उत्पादनलाई प्राथमिकता दिइएको थियो । महोत्सवको नवाैँ दिनमा दर्शकको अत्यधिक भिडका कारण प्रवेश गर्ने गेटमा ठेलमठेल हुँदा ३० जना घाइतेसमेत भएका थिए ।