मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १६ शुक्रबार
  • Friday, 29 March, 2024
कोसी अस्पतालका निलम्बित डा. आकाश यादव । उनीसँग अहेवद्वय लक्ष्मण माझी र टीका अधिकारीलाई पनि निलम्बन गरिएको छ ।
गणेश लम्साल विराटनगर
२०७९ माघ ६ शुक्रबार ०६:०९:००
Read Time : > 1 मिनेट
फ्रन्ट पेज प्रिन्ट संस्करण

जीवित शिशुलाई मृत घोषणा प्रकरण : डाक्टरसहित तीनजना सात दिनका लागि निलम्बित, छानबिन समिति गठन

Read Time : > 1 मिनेट
गणेश लम्साल, विराटनगर
२०७९ माघ ६ शुक्रबार ०६:०९:००

जीवित शिशुलाई मृत घोषणा गर्ने कोसी अस्पतालका डा. आकाश यादवसहित तीनजना सात दिनका लागि निलम्बनमा परेका छन् । अस्पतालले इमर्जेन्सीमा कार्यरत डा. यादव तथा अहेवद्वय लक्ष्मण माझी र टीका अधिकारीलाई निलम्बन गरेको हो । 

अस्पतालले घटनाको विस्तृत छानबिनका लागि बालरोग विशेषज्ञ डा. प्रवीण झाको नेतृत्वमा तीन सदस्यीय समिति गठन गरेको छ । समितिमा अर्का बालरोग विशेषज्ञ डा. सूर्यकान्त चौधरी र प्रशासनका तर्फबाट रामप्रसाद नेपाल सदस्य छन् ।

अस्पतालका निमित्त प्रमुख डा. लक्ष्मीनारायण यादवले समितिले सात दिनभित्र छानबिन गरेर प्रतिवेदन बुझाउने र उपचारमा संलग्नहरू दोषी देखिए थप कारबाही गरिने बताए । ‘बालकको उपचारमा संलग्नलाई तुरुन्त स्पष्टीकरण सोधेर निलम्बन गरिसकेका छौँ । घटना संवेदनशील भएकाले छानबिनका लागि समिति पनि गठन गरिएको छ । समितिले सात दिनभित्र प्रतिवेदन बुझाउँछ । प्रतिवेदनअनुसार दोषी देखिए संलग्नमाथि थप कारबाही हुन्छ,’ उनले भने । 

मोरङको जहदा गाउँपालिका– ३ भाथीगन्जीका दिलीप मुखिया र उनकी पत्नी उमाले श्वासप्रश्वासको समस्या देखिएपछि बुधबार बिहान १८ दिनकी छोरीलाई कोसीको आकस्मिक कक्षमा लगेका थिए । तर, ड्युटीमा रहेका मेडिकल अफिसर डा. आकाशले धड्कन बन्द भइसकेको भन्दै छोरी फिर्ता लैजान भनेका थिए । आफू सम्हालिँदै र पत्नीलाई सम्झाउँदै दिलीप छोरीलाई लिएर घर फर्किएका थिए ।

दाहसंस्कारका लागि तयारी चल्दै गर्दा अकस्मात् शिशुका हातगोडा चलमलाएपछि परिवारले तत्काल विराटनगरकै गोल्डेन अस्पताल पुर्‍याएको थियो । त्यसपछि पीडित परिवारले जीवित शिशुलाई मृत घोषणा गरेर चिकित्सकले लापरबाही गरेको भन्दै अस्पतालमा आन्दोलन गरेका थिए । डा. आकाशमाथि आक्रमण पनि गरेका थिए । 

शिशुको स्वास्थ्यमा सुधार
गोल्डेन अस्पतालमा उपचाररत शिशुको स्वास्थ्यमा सुधार भइरहेको चिकित्सक र परिवारले जनाएका छन् । उपचारमा संलग्न बालरोग विशेषज्ञ डा. सतिश यादवले भने, ‘अत्यधिक चिसोका कारण शिशुको अवस्था नाजुक थियो । हामीले तत्काल अक्सिजन दियौँ र तातो बनायौँ । अहिले स्वास्थ्यमा सुधार भइरहेको छ ।’ शिशुका बुबा दिलीपले पनि भेन्टिलेटरमा उपचार भइरहेको छोरीको स्वास्थ्यमा सुधार आएको बताए । ‘छोरीको स्वास्थ्यमा सुधार छ । डाक्टरहरूले दुई–तीन दिनमा डिस्चार्ज हुन्छ होला भन्नुभएको छ,’ दिलीपले भने ।