हरेक वर्षझैँ नुवाकोटमा गोरु जुधाएर माघेसंक्रान्तिमा रमाइलो गर्ने परम्पराले यो वर्ष पनि निरन्तरता पाएको छ । नुवाकोटको तारकेश्वर गाउँपालिका– २ तारुका र विदुर नगरपालिका– १० बेत्रावतीमा आइतबार माघेसंक्रान्तिको अवसरमा गोरु जुधाइएको हो ।
तारुकामा यो वर्ष जुधाउनका लागि २८ हल गोरु दर्ता भएको थियाे । जुधाउने गोरुको संख्या धेरै भएपछि माघेसंक्रान्तिको दिन माघ १ गते मात्र जुधाइने गरेकोमा आयोजकले २ गते पनि गोरुजुधाइ कार्यक्रम राखेका छन् । गोरु जुधाउने किसानको संख्या धेरै भएकाले दुईदिने कार्यक्रम राखिएको माघेसंक्रान्ति गोरुजुधाइ महोत्सव संरक्षण संस्थाका अध्यक्ष मदन श्रेष्ठले बताए ।
माघ १ गते १९ हल गोरु जुधाउने तयारी भए पनि समय अभावले १७ हल मात्र गोरु जुधाइएको र बाँकी गोरु सोमबार जुधाइने आयोजकले जनाएको छ । किसानले तारकेश्वर गाउँपालिकाको विभिन्न वडा र धादिङ जिल्लाका किसानले समेत मेलामा गोरु जुधाउन ल्याएका थिए ।
तारुकामा सयौँ वर्षअघिदेखि गोरु जुधाउन थालिएको भए पनि ०६२ सालबाट भने तारुकाको कटहरबोट पाटोमा एकीकृत गरी जुधाउन थालेपछि यहाँ गोरुजुधाइले एउटा विशेष पर्वको रूपमा लिँदै आएको छ । यो वर्ष पनि उल्लेख्य संख्यामा दर्शक गोरुजुधाई हेर्न पुगेका छन् ।
यस्तै, नुवाकोट र रसुवाको सीमास्थल बेत्रावतीमा पनि गोरुजुधाइ मेला गरिएको छ । बेत्रावतीमा नाै हल गोरु जुधाइएको छ । तस्बिरमा तारुकाको गोरुजुधाइ मेलाको रौनक प्रस्तुत गरिएको छ ।