प्रभु बैंकले आव ०७८/७९ असार मसान्तमा कायम रहेको चुक्ता पुँजीको ६.५० प्रतिशत बोनस सेयर पारित गरेको छ । यसमा लाग्ने करसमेतका लागि १.५० प्रतिशत नगद लाभांश दिने भएको छ । बिहीबार सम्पन्न बैंकको २१औँ वार्षिक साधारणसभाले बोनस सेयर दिने प्रस्ताव पारित गरेको हो ।
साधारणसभाले सेन्चुरी कमर्सियल बैंकको एक सय कित्ता सेयरबराबर प्रभु बैंकको एक सय कित्ता सेयर हुने गरी सेन्चुरी बैंकलाई प्राप्ति (एक्विजिसन) गर्ने प्रस्तावलाई पनि सर्वसम्मतिले पारित गरेको छ ।
साधारणसभाले बैंकको अधिकृत पुँजी वृद्धि गरी २४ अर्र्ब रुपैयाँ कायम गर्ने निर्णय गरेको छ । बोनस सेयर वितरण गर्ने निर्णय पारित भएपछि बैंकको चुक्ता पुँजी १३ अर्ब ५३ करोड ४७ लाख ६९ हजार पुगेको छ ।