कलंकी, धुम्बाराही, कपन र मण्डिखाटार क्षेत्रमा पाइपलाइन बिछ्याउने काम जारी
दैनिक रूपमा मेलम्चीको पानी चुहावट बढे पनि नयाँ पाइपलाइनबाट भने साउनदेखि मात्र पानी आउने भएको छ । हाल नयाँ पाइपलाइन विस्तार र परीक्षणको काम भइरहेकाले पुरानै वितरण प्रणालीबाट पानी वितरण भइरहेको हो ।
केयुकेएलअन्तर्गतको आयोजना कार्यान्वयन निर्देशनालय (पिआइडी)का अनुसार नयाँ वितरण प्रणालीअन्तर्गत करिब ६ सय किलोमिटर पाइपलाइनमा मात्र परीक्षण भएको छ । चार सय किलोमिटर पाइपलाइनको परीक्षण बाँकी नै छ । पिआइडीका अनुसार मेलम्चीको पानी काठमाडौं आएपछि हाल १० किलोमिटर थप पाइपलाइनको परीक्षण भएको छ ।
‘असारसम्म नयाँ पाइपलाइनको विस्तार र परीक्षण सम्पन्न गर्ने लक्ष्य राखेका छौँ । असारसम्म परीक्षणको काम सकिए साउनदेखि नयाँ पाइपलाइनबाट पानी वितरण हुनेछ,’ पिआइडीका निर्देशक राजेन्द्र सापकोटाले भने, ‘चक्रपथभित्रकै ६ सय किलोमिटर पाइपलाइनको मात्र परीक्षण भएको छ । मेलम्चीको पानी आए पनि बल्ल १० किलोमिटर पाइपलाइन परीक्षण गरेका छौँ ।’
कलंकी, धुम्बाराही, कपन र मण्डिखाटार क्षेत्रमा पाइपलाइन बिछ्याइँदै
उनका अनुसार कलंकी, धुम्बाराही, कपन र मण्डिखाटार क्षेत्रमा पाइपलाइन बिछ्याउने काम नै भइरहेको छ । ‘जतिसक्दो छिटो नयाँ पाइपलाइनबाट पानी विरतणका लागि काम गरिरहेका छौँ । तर, लिकेजका समस्या, कहिले ढलको काम, कहिले केबललगायतका काम समन्वयविना हुँदा समस्या भइरहेको छ,’ सापकोटाले भने ।
०७८ चैतमा पानी आउनुअघि जम्मा सय किलोमिटर नयाँ वितरण लाइनमा ट्यांकरको पानी हालेर परीक्षण गरिएको थियो । करिब एक हजार एक सय किलोमिटर नयाँ पाइप बिछ्याउने काम सम्पन्न भएको थियो । उनका अनुसार नयाँ प्रणालीमा जोडिएका एक लाख १० हजार घरधुरीलाई छिटै पानी पुर्याउन व्यवस्था हुनेछ ।
अनामनगर र ललितपुरका केही स्थानबाहेक अझै पनि सबै ठाउँमा पुरानै वितरण लाइनबाट पानी आइरहेको छ । जसकारण नयाँ प्रणालीबाट वितरण सुरु नगरेसम्म उपत्यकाका सबै ठाउँमा मेलम्चीको पानी नआउने केयुकेएलले जनाएको छ ।