कतारमा ज्यान गुमाएका ठाकुरको परिवारलाई आर्थिक सहयोग
गत वर्ष कतारमा सडक दुर्घटनामा परि ज्यान गुमाएका मनरा महोत्तरी सिस्वा नगरपालिका –१० मरुवाहीका मृतक मंगल ठाकुरको परिवारलाई हेल्प मधेशी कतार नामक संस्थाले आर्थिक सहयोग गरेको छ ।
आर्थिक विपन्नताले घर परिवार चलाउन समस्या भएपछि हेल्प मधेशी नेपालका अध्यक्ष राम उदगार यादवसहितका पदाधिकारीहरु मृतक ठाकुरको घरमै पुगि २१ हजार रुपैयाँ आर्थिक सहयोग गरेका छन् । रकम मृतकको बुहारी संगिता देवी ठाकुरले ग्रहण गरेकी हुन् । उक्त रकम हेल्प मधेशी कतार च्याप्टरको सहयोगमा पठाइएको हो ।
वैदेशिक रोजगारीमा रहेका युवाहरुले प्रत्येक महिना एक एक रियालको दरले संकलन गर्ने गर्छन् । सोही रकमबाट स्वदेशमै वा विदेशमा ज्यान गुमाएका वा आर्थिक रुपमा विपन्नहरुको सहयोग गर्दै आएको हेल्प मधेशी नेपालका अध्यक्ष राम उदगार यादवले वताए । पीडित र दुःखीको अनुहारमा थोरै मुस्कान छर्न हेल्प मधेशीको सानो प्रयास मात्र भएको उनले बताए ।
आर्थिक सहयोग गर्न हेल्प मधेशी नेपाल च्याप्टरका सचिव अमरनाथ साफी, सदस्य संजय यादव, सेवक हरेराम यादव, अर्चना साह, हेल्प मधेशी साउदीका केन्द्रीय कोषाध्यक्ष राजमण्डल र अलुसेमि दलानसहित उप प्रमुख संजिव दास समेत पीडितको घर पुगेका थिए ।