मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १६ शुक्रबार
  • Friday, 29 March, 2024
२०७९ मङ्सिर १ बिहीबार २०:३६:००
Read Time : < 1 मिनेट
विश्व डिजिटल संस्करण

युक्रेनमाथि भीषण हवाई हमला, पूर्वाधारमा व्यापक क्षति

Read Time : < 1 मिनेट
२०७९ मङ्सिर १ बिहीबार २०:३६:००

रुसले युक्रेनी भौतिक पूर्वाधारमा भीषण हवाई हमला गरेको छ। हवाई आक्रमणबाट युक्रेनी ऊर्जा संरचना, आवासीय भवन र औद्योगिक केन्द्रमा व्यापक क्षति भएको छ।

युक्रेनी अधिकारीहरूका अनुसार मानवरहित विमान र क्षेप्यास्त्र आक्रमणमा परी चारजनाको मृत्यु भएको छ भने १२ जनाभन्दा बढी घाइते भएका छन्। यसैबीच, संयुक्त राष्ट्रसंघका महासचिव एन्टोनियो गुटरेसले ब्ल्याक सीबाट अन्न, खाद्यसामग्री र मलखादको सुरक्षित निर्यातका निम्ति भएको चार महिनाअघिको सहमतिको म्याद समाप्त हुन केही दिनअघि त्यसलाई थपिएको घोषणा गरेका छन्। इस्तानबुलमा टर्कीसहित रुस र युक्रेनबीच भएको खाद्यान्न निर्यातको सम्झौतालाई कार्यान्वयन गराउन राष्ट्रसंघ पूर्ण प्रतिबद्ध रहेको बताएका छन्।

महासचिव गुटरेसले अनाज निर्यातका निम्ति समयावधि थपिएको सम्बन्धमा गरेको घोषणा तथा पुरानो सम्झौताको निरन्तरताबारे रुसले तत्काल केही जानकारी दिएको छैन। युक्रेन युद्ध नवौँ महिनामा प्रवेश गर्न लागेको वेला मस्कोले अत्याधुनिक क्षेप्यास्त्र आक्रमण गरेर युक्रेनभर युद्ध विभीषिका चर्काएको छ। किएभको सैनिक प्रशासनले दुईवटा रुसी क्षेप्यास्त्र  तथा इरानमा बनेका पाँचवटा मानवरहित विमान खसालेको बताएको छ। स्थलयुद्धमा रुसी सैनिक पराजित भएपछि क्रेमलिनले युक्रेनमाथि हवाई आक्रमणलाई व्यापक बनाउँदै उसका ऊर्जा पूर्वाधार, गैरसैनिक बस्तीमा कारबाहीलाई तीव्र गतिमा अघि बढाएको छ।