अर्थविद् डा. स्वर्णिम वाग्लेले नेपालको अर्थतन्त्र सुधार गर्न राजनीतिक नेतृत्वमा युवा आउनु आवश्यक रहेको बताएका छन्। 

बुधबार बागमती क्याम्पसका विद्यार्थीलाई सन् २०३० सम्म नेपालको अर्थतन्त्रको मार्गचित्रका विषयमा प्रशिक्षण दिँदै अर्थविद् डा. वाग्लले यस्तो बताएका हुन्। 

उनले नेपालको अर्थतन्त्रलाई अन्तर्राष्ट्रिय मुलुकसँग प्रतिस्पर्धी बनाउन राजनीतिक निर्णय तथा नीतिहरूमा सुधार ल्याउनुपर्ने बताए। 

डा. वाग्लले मुलुकको अर्थतन्त्र सबल र चलायमान बनाउँदै माथि उठाउन राजनीतिक नेतृत्व सक्षम हुनुपर्ने बताए। यथास्थितिमा भने मुलुकको अर्थतन्त्र माथि जान नसक्ने दाबी गर्दै उनले नेपालमा अबको पाँच वर्षमा हवाई क्षेत्रमा सुधार, होटेल पूर्वाधारको विस्तार, दक्ष जनशक्ति उत्पादन गरेर २० लाख पर्यटक ल्याउनुपर्नेमा जोड दिए। 

नेपाल आउने पर्यटकले गर्ने खर्च दैनिक सय डलर बनाएर घुम्ने र बस्ने अवधि १६ दिनसम्म बनाउँदा मात्रै पर्यटन क्षेत्रबाट आम्दानी बढ्न सक्ने उनको भनाइ थियो।

उनले रेमिट्यान्सले धेरै समय मुलुकको अर्थतन्त्र धान्न नसक्ने दाबी गरे। नेपालको पूर्वाधार तथा उद्योगमा विदेशी लगानी ल्याउँदै नेपाली उत्पादनलाई अन्तर्राष्ट्रिय बजारमा पुर्‍याएर पर्यटक बढाउँदा मात्रै मुलुकको अर्थतन्त्र माथि उठ्न सक्ने उनको भनाइ थियो।

‘अहिले नेपाललाई रेमिट्यान्सले धानेको छ। तर, रेमिट्यान्सले नेपाललाई टाढा लाँदैन । अब विदेशी लगानी भित्र्याउनुपर्‍यो। नेपाली उत्पादनलाई विदेशमा पुर्‍याएर आम्दानी पनि बढाउनुपर्छ। पर्यटन, विदेशी लगानी बढाउँदा, उत्पादन बढाउँदा पनि नेपालको आर्थिक क्षेत्रबाट माथि उठाउन सक्छ,’ उनले भने, ‘राजनीतिक निर्णय तथा नीतिहरू अन्तर्राष्ट्रिय मुलुकसँग प्रतिस्पर्धी बनाउने गरी गर्नुपर्छ। मुलुकको अर्थतन्त्र सबल र चलायमान बनाउन अहिलेको व्यवस्थाको निरन्तरता हुनुहुँदैन । यथास्थितिमा मुलुकको अर्थतन्त्र माथि जान सक्दैन। त्यसैले मुलुकको अर्थतन्त्र माथि लान राजनीतिक नेतृत्वमा युवा अगाडि आउनुपर्छ।’