एक २४ वर्षीय युवकले गरेको आर्थिक अपराधबाट अनुसन्धानमा आबद्ध प्रहरी अधिकारी नै चकित भएका छन् । काभ्रेपलाञ्चोक मण्डनदेउपुर नगरपालिका–८ घर भई भक्तपुर सूर्यविनायक बस्ने अनिल ढुंगानाले पछिल्लो दुई वर्षमा दुई अर्बभन्दा धेरै रकम अवैध रूपमा कारोबार गरेका छन् ।
एसएसपी सानुराम भट्टराई, प्रमुख, अपराध अनुसन्धान कार्यालय
अनुसन्धानबाट आरोपी युवकले विभिन्न खाता र वालेटमार्फत दुई अर्ब एक करोड १८ लाखबराबरको अवैध आर्थिक कारोबार गरेको देखिन्छ । उनी क्रिप्टोकरेन्सीको अवैध कारोबार गर्ने मुख्य एजेन्ट भएको पनि खुलेको छ ।
त्यसका लागि उनले ५६ वटा बैंक खाता, ११ वटा कनेक्ट आइपिएस तथा १५ वटा इसेवा वालेट अकाउन्ट प्रयोग गरेका थिए । ढुंगानालाई पक्राउ गरी काठमाडौं उपत्यका अपराध अनुसन्धान कार्यालयले विस्तृत अनुसन्धान अघि बढाएको छ । अनलाइन बेटिङको प्रमुख एजेन्टका रूपमा काम गरेका ढुंगानाले यसरी विभिन्न व्यक्तिका नाममा खाता खोलेर कारोबार गरेका हुन् । उनले एक अर्ब ३४ करोड ५२ लाख रुपैयाँको बाइनान्स एपमार्फत क्रिप्टोकरेन्सीको मात्र कारोबार गरेका थिए ।
उनले विभिन्न खेलकुदमा बेटिङ पनि लगाउँदै आएका थिए । वानएक्सबेटमार्फत उनले दुई वर्षदेखि सट्टेबाजी धन्दा चलाउँदै आएको अपराध अनुसन्धान कार्यालयका प्रमुख एसएसपी सानुराम भट्टराईले बताए । ‘हालसम्मको अनुसन्धानमा उनले विभिन्न खाता र वालेटमार्फत दुई अर्ब एक करोड १८ लाखबराबरको अवैध आर्थिक कारोबार गरेको देखिन्छ,’ उनले भने, ‘उनी क्रिप्टोकरेन्सीको पनि अवैध कारोबार गर्ने मुख्य एजेन्ट भएको खुलेको छ ।’ इसेवा वालेटमा मात्र उनले पाँच करोड रुपैयाँबराबरको कारोबार गरेका छन् । जुन सट्टेबाजीको लेनदेन भएको हुन सक्ने प्रहरी आशंका छ ।
एउटै खाताबाट धेरै कारोबार गर्दा शंका हुने भएकाले उनले यसरी धेरै बैंक खाता र वालेट प्रयोग गरेको हुन सक्ने प्रहरीले जनाएको छ । अवैध कारोबारमा बैंक खाता खोलेर उनलाई सघाउनेहरूमाथि समेत अनुसन्धान गर्न प्रहरी तयारी छ । साथै, उनीसँग मिलेर अवैध बेटिङ लगाउने गिरोहमाथि समेत छानबिन गरिने अपराध अनुसन्धान कार्यालयले जनाएको छ । अपराध कर्मबाट उनले कमाएको सम्पत्तिका बारेमा समेत प्रहरीले छानबिन अघि बढाएको छ । यसमा गिरोह नै रहेको प्रहरीको आशंका छ ।
उनले सामाजिक सञ्जालमा जुवा ३६५ नामक पेजसमेत सञ्चालन गरी अनलाइन बेटिङको प्रचार गरी कारोबार फैलाएका थिए । प्रहरीले सट्टेबाजी गराउन प्रयोग भएका ६ वटा मोबाइल र ३८ वटा सिमकार्ड बरामद गरेको छ । उनीसँग क्रिप्टो वालेटसमेत रहेको एसएसपी भट्टराईले बताए । उनीसँग भारतीय आधार कार्डसमेत भेटिएको छ ।
भारतीय प्यानकार्डसमेत भेटिएकाले उनको भारतमा समेत कारोबार भएको हुन सक्ने प्रहरीको आशंका छ । भक्तपुरबाट पक्राउ परेका ढुंगानामाथि थप अनुसन्धान र कारबाही जिल्ला प्रहरी परिसर, भक्तपुरले गर्ने भएको छ ।
