बजार नपाउँदा बारीमै सुक्दै सयपत्री - Naya Patrika
eNaya Patrika
  • ePaper

बजार नपाउँदा बारीमै सुक्दै सयपत्री

तिहारका लागि लाखौँ मूल्यका कृत्रिम माला भारतबाट आयात भइरहँदा नेपाली किसानले उत्पादन गरेको फूलले भने बजार पाउन सकेको छैन । तिहारको मुखैमा ढकमक्क फुलेको सयपत्री बिक्री नहुँदा बारीमै ओइलाउन थालेको छ ।

धनगढी–२ का चन्द्रबहादुर नेपालीले ८ कट्ठा जमिनमा लगाएको सयपत्री ढकमक्क फुलेको छ । तर, फूल किन्न अहिलेसम्म ग्राहक नआउँदा चन्द्रबहादुर निराश छन् । ‘फूल बोटमै ओइलिन थालिसक्यो,’ चन्द्रबहादुरले भने, ‘तिहारको दिनसम्म केही बिक्री हुन्छ भन्ने आशा छ ।’ उनले तीन वर्षदेखि व्यावसायिक फूल खेती गरिरहेका छन् । तिहारको सिजनमा पाँच लाखसम्मको कारोबार हुने अपेक्षा रहे पनि बिक्री नहुँदा आधाभन्दा बढी फूल बिग्रन थालेको छ ।

६ कट्ठा आफ्नै जमिन र २ कट्ठा भाडामा लिएर फूल लगाएको चन्द्रबहादुरकी श्रीमती मीरा नेपालीले बताइन् । मनै लोभ्याउने गरी एक हप्ताअगाडिदेखि फुलेको सयपत्री अहिले बोटमै सुक्न थालेपछि दुःख लागेको उनको भनाइ छ । उनले भनिन्, ‘सयपत्री ढकमक्क फुल्दा खुसी लागेको थियो, तर त्यही फूल अहिलेसम्म एउटा पनि बिक्री नभई बोटमै सुक्न थाल्दा दुःख लागिरहेको छ ।’

साढे सात लाखको माला आयात
कैलालीको त्रिनगर भन्सार भएर भारतबाट साढे सात लाख रुपैयाँभन्दा बढी मूल्यका कृत्रिम माला तिहारका लागि आयात भएका छन् । २ हजार ४ सय ६४ किलो कृत्रिम माला भारतबाट भित्रिएको त्रिनगर भन्सार कार्यालयका भन्सार अधिकृत नारायणदत्त जोशीले जानकारी दिए ।

तपाईको प्रतिक्रिया