एउटै बिमालेखले सबैको बिमा - Naya Patrika
eNaya Patrika
  • ePaper

एउटै बिमालेखले सबैको बिमा

अबदेखि एउटै बिमालेखले मानिस, चौपाया तथा घरको पनि बिमा गर्न सकिने भएको छ । बिमा समितिले निर्माण गर्न लागेको एकीकृत बिमालेखले सामूहिक बिमा गर्न सकिने भएको हो । समितिले बाढी प्रभावित क्षेत्रका बासिन्दालाई लक्षित गरी एकीकृत बिमालेख निर्माण गर्ने तयारी गरेको समितिका उपनिर्देशक कुन्दन सापकोटाले बताए ।

राजुरमण पौडेल निमित्त कार्यकारी निर्देशक,बिमा समिति

‘समितिले सामान्य नागरिकलाई लक्षित गरी एउटा बिमालेखले सबैको बिमा गर्न सकिने योजना बनाउँने सोच धेरैअघिदेखि बनाएको हो,’ उनले भने, ‘तर, अहिले सुरुवात हामीले बाढीप्रभावित क्षेत्रलाई लक्षित गरेका छौँ । यस्ता क्षेत्रमा रहने मानिस बढी जोखिममा रहने भएकाले यस्तो बिमालेख बनाउने योजना बनाएका हौँ ।’ बिमालेखको नाम अहिलेलाई एकीकृत बिमालेख राखिए पनि यसको निर्णय भने नभएको उनले बताए । साथै बिमांक रकमको अन्तिम निर्णय पनि हुन बाँकी छ । प्रारम्भिक चरणमा रहेको उक्त बिमालेखलाई समितिको सञ्चालक समितिको बैठकले पारित गर्नुपर्नेछ । साथै सरकारको स्वीकृतिपछि मात्रै बिमा कम्पनीहरूले जारी  गर्न पाउनेछन् ।

बिमांक गणना
समितिले प्रारम्भिक चरणमा बिमांक रकम ५ लाख ७५ हजार रुपैयाँ राखेको छ । जसमा परिवारको प्रतिव्यक्ति २ लाख रुपैयाँ राखिएको छ । चौपायाको २ लाख ५० हजार रुपैयाँ र घर÷झुपडीको २५ हजार रुपैयाँ राखिएको छ । फरक–फरक चौपाया भएमा चौपाया तथा त्यसको बिमांक रकम प्रस्ट रूपमा खुलाउनुपर्नेछ । चौपायाको संख्या जेजति भए पनि २ लाख ५० हजारभन्दा बढी बिमांक कायम गर्न पाइनेछैन । बिमांकको शून्य दशमलव ५ प्रतिशत बिमाशुल्क कायम गरिएको छ । बिमालेख प्रारम्भिक चरणमा रहेकाले बिमांक रकम तलमाथि पनि हुन सक्ने समितिले बताएको छ । समितिका अनुसार मस्यौदा छलफल भइरहेको छ । विज्ञहरूको सल्लाहअनुसार बिमांक रकम फेरबदल हुन सक्नेछ ।

बिमालेखले रक्षावरण गर्ने जोखिमहरू
एकीकृत बिमालेखले मानवीय क्षति वा सम्पत्तिको हानिनोक्सानी भएमा बिमांकको सीमाभित्र रही सम्बन्धित पक्षलाई भुक्तानी गर्नेछ । बिमालेखले बाढी, डुबान (जलमग्न), पहिरोबाट हुने जोखिमको मात्रै रक्षावरण गर्नेछ । तर, बिमित वा निजको एकाघर परिवारका सदस्यको लापरबाहीको कारण क्षति भएमा कम्पनी दाबी भुक्तानीका लागि बाध्य हुने छैन । त्यस्तै, कानुनी निकायको आदेशमा बिमा गरिएको सम्पत्तिलाई नष्ट गर्नुपर्ने भएमा, बिमा गरिएको सम्पत्तिको चोरी भएमा, बिमितले प्रस्ताव फाराममा विवरण दिँदा झुट्टा विवरण उल्लेख गरेमा पनि कम्पनी भुक्तानीका लागि उत्तरदायी हुने छैन ।

दाबी भुक्तानी प्रक्रिया
बिमालेखअनुसार बिमा अवधिभित्र बाढी र पहिरोका कारणले बिमितको मृत्यु भएमा वा हराएमा कम्पनीले २ लाख रुपैयाँ भुक्तानी गर्नेछ । दाहसंस्कारका लागि १० हजार रुपैयाँ प्रदान गर्नेछ । तर, बिमा दाबी भुक्तानी रकम कुल बिमांक रकमभन्दा बढी हुनेछैन । बिमा अवधिमा कुनै घटना घटेमा बिमकलाई जानकारी दिनुपर्नेछ । साथमा सक्कल बिमालेख, दाबी फारम, वडा कार्यालयको सिफारिस, स्थानीय निकायको सिफारिस र फोटो पनि पेस गर्नुपर्नेछ ।

सामूहिक बिमा गर्न सकिने बिमालेख ल्याउँछौँ
राजुरमण पौडेल
निमित्त कार्यकारी निर्देशक,बिमा समिति
हाम्रो लक्षित वर्ग भनेकै न्यून आय भएका व्यक्ति हुन् । तर, यस्ता व्यक्तिहरूमा बिमा चेतना कम हुन्छ । उनीहरू दैनिक गुजारा गर्दैमा व्यस्त छन् भने सुरक्षाको विषयमा सोच्न भ्याउँदैनन् । तर, थोरै मूल्यको एउटै बिमाले घरमा रहने मानिस र सम्पत्तिको सुरक्षा ग-यो भने यस्ता वर्ग लाभान्वित हुनेछन् ।

त्यसैगरी यस्तो बिमालेखले मानिसलाई सुरक्षा प्रदान गर्छ भने कम्पनीको व्यवसाय पनि बढ्नेछ । किनभने एउटा घरमा धेरै कुराहरू बिमायोग्य हुन्छन् । जस्तै, कुनै मानिसले आफ्नो बिमा गराउन चाहन्छ भने उसको घरमा धेरै बिमायोग्य वस्तु हुन सक्छन् । घर हुन सक्छ, मोटर वा मोटरसाइकल हुन सक्छ, पशु हुन सक्छ ।

यसरी सबैको बिमाका लागि फरक–फरक बिमालेख खरिद गरिरहनुभन्दा एउटा बिमालेखले सबैको रक्षावरण गर्ने हो भने मानिसले सहज महसुस गर्छ । खरिद गर्नेलाई र बिक्री गर्नेलाई पनि सहज हुन्छ । त्यसैले हामी यस्तो खालको बिमालेख ल्याउने तयारी गर्दै छौँ । यसैका लागि हामीले हालै सम्पत्ति बिमा निर्देशिका पनि तयार पारेका छौँ । यसको मस्यौदा सञ्चालक समितिमा पुगेको छ । साथै बाढीप्रभावित क्षेत्रलाई लक्षित गरी एकीकृत बिमालेख निर्माण गर्दै छौँ ।

 

तपाईको प्रतिक्रिया