सिरिया संकट इडलिबमा सरकारी सेनाको निरन्तर हमला - Naya Patrika
eNaya Patrika
  • ePaper
logo
Advertisment
SKIP THIS

सिरिया संकट इडलिबमा सरकारी सेनाको निरन्तर हमला

सिरियाको सरकारी सेनाले इडलिब सहरमा विद्रोहीलाई लक्षित गरेर सुरु गरेको हवाई हमलाका कारण ३० हजारभन्दा बढी जनता विस्थापित भएको संयुक्त राष्ट्रसंघले जनाएको छ । रुसी तथा सिरियाली सैनिकले यस क्षेत्रमा पछिल्लो एक सातादेखि बम हमला गरिरहेका छन् ।

यसअघि शुक्रबार सिरियाका सहयोगी राष्ट्र रुस तथा इरानसँग टर्कीले युद्धविराम गर्नका लागि प्रस्ताव गरेको थियो । तीन राष्ट्रबीचको लामो छलफलका क्रममा टर्कीका राष्ट्रपति रिसेप इर्डोगानले गरेको आग्रह रुसी राष्ट्रपति भ्लादिमिर पुटिन र इरानका राष्ट्रपति हसन रोउहानीले अस्वीकार गरेका थिए । पुटिन र असदले सिरियामा आतंककारीलाई पूर्ण रूपमा ध्वस्त पार्न आवश्यक रहेको बताएका थिए ।


त्यसयता शनिबारबाट सिरियाको सरकारी सेनाले रुसको सहयोगमा फेरि हवाई हमला सुरु ग-यो, जुन अहिलेसम्म निरन्तर छ । यस हमलाका क्रममा विनाशकारी ग्यासयुक्त विस्फोटक पदार्थको प्रयोग गरिएको अन्तर्राष्ट्रिय सञ्चारमाध्यमले जनाएका छन् । विध्वंशकारी हमलामा परेर आइतबार कम्तीमा दुई बालबालिकासहित केही स्थानीयको मृत्यु भएको उद्धारकर्मीहरूले बताए ।

संयुक्त राष्ट्रसंघका मानवीय सहायता मामिला प्रमुख मार्क लोककले २१औँ शताब्दीकै विनाशकारी मानवीय क्षति निम्त्याउने घटनाका रूपमा यो घटना विकसित हुन सक्ने खतरा औँल्याएका छन् । ‘इडलिबमा एक्काइसौँ शताब्दीकै भयानक दुर्घटनालाई जोगाउने हो भने धेरै समय नलिई यसको समाधानको प्रयास थाल्नु जरुरी रहेको छ,’ लोककले सोमबार सञ्चारकर्मीहरूसँग भने ।

 कहाँ–कहाँ भयो हवाई आक्रमण ?
इडलिबको दक्षिणी क्षेत्रमा एडलिभ र अल हाबिटमा निरन्तर रूपमा सेनाले आक्रमण गरिरहेको बेलायती संस्था मानवअधिकारका लागि सिरियाली पर्यवेक्षणले जनाएको छ । आइतबार टर्कीको सीमा क्षेत्रनजिक ठूलो आक्रमण भएको सो संस्थाले जनाएको छ ।

‘सरकारी हेलिकोप्टरले अल हबिट गाउँमा ६० भन्दा बढी बारेल बम खसालिरहेका छन्,’ पर्यवेक्षण समूहका प्रमुख रामी अब्देल रहमानले भनेका छन् । घटनामा कम्तीमा दुई बालबालिकाको मृत्यु तथा ६ भन्दा बढी घाइते भएको विवरण प्राप्त भएको उक्त संस्थाले जनाएको छ ।

सिरियाली सेनाले बारेल बम प्रयोग नगरेको दाबी गरेको छ । इडलिबबाट उत्तरतर्फ रहेका सालकिन र दाना क्षेत्रमा पनि हमला भएको छ । तर, त्यहाँ अहिलेसम्म कुनै मानवीय क्षति भएको छैन ।
रुसी जेटले उत्तरी हामास्थित लाटाम्नेह र कर्फ जेइटा क्षेत्रमा आक्रमण गरेको हुन सक्ने पर्यवेक्षण समूहले जनाएको छ । यस घटनामा लाटाम्नेह गाउँका पाँचजना घाइते भएको जनाइएको छ । हमलाका कारण अस्पतालमा क्षति पुगेको छ । यसअघि शनिबार पनि इडलिबको दक्षिणी सहर हासमा रहेको स्वास्थ्य चौकी हवाई हमलाकै कारण क्षतिग्रस्त भएको थियो ।

‘स्वास्थ्य सेवामाथिको बढ्दो आक्रमण निन्दनीय छ । सिरियाको यो भीडभाडपूर्ण क्षेत्रमा दशौँ लाख जनता खतराको जीवन बाँचिरहेका छन्,’ अमेरिकास्थित युनियन अफ मेडिकल केयर एन्ड रिलिफ अर्गनाइजेसन्सका प्रमुख गानेम तायाराले विज्ञप्ति जारी गर्दै भनेका छन् ।

रुस तथा इरानको सहयोगप्राप्त सिरिया सरकारले इडलिब तथा विद्रोहीको कब्जामा रहेका उत्तरपश्चिमा क्षेत्रका गाउँहरूलाई आफ्नो नियन्त्रणमा फर्काउन खोजेको छ । यो क्षेत्र विद्रोही पक्षको बलियो प्रभाव रहेको एक मात्रै क्षेत्र हो । हवाई हमलापछि आतंकित भएका हजारौँ स्थानीय सहयोगको आशामा सडकमा ओर्लिएका थिए । दर्जनौँ कार तथा ट्रकले उनीहरूलाई उद्धार गरेर सुरक्षित स्थानमा लगे ।

टर्कीसहितका देशले रुसले टर्किस सीमा क्षेत्रनजिकैको यस क्षेत्रमा यसरी नै निरन्तर हमला गरिरहे रक्तपातपूर्ण अवस्था सिर्जना हुने चेतावनी दिएका छन् । संयुक्त राष्ट्रसंघले यस्तो क्रूरतापूर्ण अवस्थाले दशौँ हजार सर्वसाधारणलाई खतरामा पारेको भन्दै चिन्ता व्यक्त गरेको छ ।

कसको कब्जामा छ इडलिब ?
इडलिबको आधाभन्दा बढी क्षेत्रफल हायात ताहासिरर अल साम (एचटिएस)को कब्जामा छ । यो समूह अलकायदाको सहयोगी समूह हो । बाँकी क्षेत्रमा विपक्षी पार्टीको पकड छ । सरकारी सेनाले दक्षिणपूर्वी क्षेत्रमा मात्रै आफ्नो नियन्त्रण राख्न सकेको छ ।

एचटिएस र अन्य केही विद्रोही समूहहरू छिमेकी प्रान्त एलेप्पो, हामा र लाटाकियाका केही भूभागमा पनि क्रियाशील छन् । रुसले आफ्नो आक्रमण अलकायदाप्रेरित समूहप्रति मात्रै लक्षित रहेको र सर्वसाधारणलाई असर गर्ने गरी निसाना नबनाएको दाबी गरेको छ ।

यद्यपि, विपक्षी पार्टी तथा स्थानीयहरूले पछिल्ला दिनमा मारिनेमध्ये सबैभन्दा धेरै सर्वसाधारण नै रहेको जनाएका छन् । इडलिबमा सरकारी सेनाले पछिल्लो एक महिनादेखि नै गस्ती सुरु गरेको थियो । यसै वर्षको सुरुवातमा सरकारी सेनाले विद्रोहीको कब्जामा रहेका देशका अधिकांश भूभाग फिर्ता गरेका थिए । सन् २०११ मा सिरियाली गृहयुद्ध सुरु भएयता ३ लाख ५० हजारभन्दा बढी व्यक्तिको मृत्यु भइसकेको छ भने दशौँ लाखले देश छाडेका छन् ।

 

तपाईको प्रतिक्रिया