रहस्यमय घटना : पूर्वराजदूतको हत्या र सांसदलाई धम्की - Naya Patrika
eNaya Patrika
  • ePaper
logo
Advertisment
SKIP THIS

रहस्यमय घटना : पूर्वराजदूतको हत्या र सांसदलाई धम्की

पूर्वराजदूत केशवराज झाको घरभित्रै बीभत्स हत्या भएको १५ दिन भएको छ । प्रहरीले उनका तीन कामदारलाई १५ दिनदेखि थुनामा राखेर अनुसन्धान गरिरहेको, तर हत्या गर्नेहरू कसरी घरभित्र छिरे भन्ने नै अहिलेसम्म प्रहरीले पत्तो लगाउन सकेको छैन ।

गत ४ भदौमा बबरमहलस्थित आफ्नै घरमा सुतिरहेको अवस्थामा चक्कुले टाउको र घाँटीमा आक्रमण गरी उनको हत्या भएको थियो । घरमा झादम्पती मात्रै बस्दै आएका थिए । श्रीमती पहिलो तलामा सुत्थिन् भने उनी भुइँ तलामा । घर बन्द भएकाले कसरी हत्यारा घरभित्र छिरे भन्नेमै प्रहरी अल्झिएको छ । जसले ‘हाइप्रोफाइल मर्डर’ अनुसन्धानमा प्रहरीले केही तथ्य भेटाउन सकेको छैन ।

१५ दिनदेखि तीन कामदार हिरासतमा
दुई सातासम्म प्रहरी अनुसन्धान झाको घरमा काम गर्ने तीन कामदारमाथि नै घुमेको छ । झाको घरमा काभ्रे स्थायी घर भएका ४८ वर्षिय कान्छाराम तामाङ घरेलु कामदारका रुपमा कार्यरत थिए । बेलुका सुरक्षागार्डको काम पनि उनले नै गर्दथे । गेट नजिकैको टहरोमा सुत्दथे । प्रहरीको सबैभन्दा ठूलो आशंका उनैमाथि छ । त्यस्तै सो घरमा हरेक दिन बिहान मालीका रुपमा काम गर्ने ५३ वर्षिय आइतेसिंह तामाङ र गोरखाका ५६ वर्षिय जयबहादुर गुरुङलाई थुनामा राखी अनुसन्धान गरिरहेको छ । उनीहरुमाथि झुटो बोलेको पत्ता लाग्ने ‘पोलिग्राफ टेस्ट’ समेत भइसकेको छ । तर, हत्यामा संलग्नताको कुनै तथ्य भेटेको छैन । कान्छारामको पोलिग्राफ टेस्टमा कैफियत भेटिएको स्रोत बताउँछ ।

सो घटनाको धेरै कोणबाट अनुसन्धान भइरहेको र थप केही कुरा बुझ्नुपर्ने देखिएकाले कामदारलाई थुनामै राखिएको महानगरीय अपराध महाशाखाका प्रमुख एसएसपी धीरजप्रताप सिंह बताउँछन्  । स्रोतका अनुसार घटनास्थलमा भेटिएको ‘फिंगरप्रिन्ट’ लगायतको रिपोर्ट नआएसम्म उनीहरुलाई थुनामै राख्ने प्रहरी तयारी छ । अनुसन्धानमा आबद्ध प्रहरीको भनाईमा घटनामा घर बाहिरका सदस्यको संलग्नता ज्यादै न्यून देखिन्छ । जसकारण प्रहरीले कामदार बाहेक अन्य व्यक्तिमाथि अनुसन्धानमा चासो दिएको छैन । प्रहरीको तालिमप्राप्त कुकुरले पनि घटनामा घरभित्रकै व्यक्तिको संकेत गरेको थियो ।

किन रहस्यमय बन्यो घटना ?
घटनास्थलको प्रकृतीका आधारमा यो निकै योजनाबद्ध र रहस्यमय हत्या भएको प्रहरी अधिकारीहरु बताउँछन् । किनकी घटना बन्द घरभित्र भएको छ ।

अहिलेसम्मको अनुसन्धानमा हत्या गर्ने व्यक्तिहरु पहिलो तलामा रहेको झ्यालको जाली काटेर भित्र छिरेको आँकलन गरिएको छ । तर, त्यसको विश्वस्त आधार छैन । झ्यालको जाली थोरै मात्र काटिएको छ, जहाँबाट मान्छे भित्र छिर्न सम्भव छैन । त्यसबाट हात छिराएर झ्यालको लक खोलेर भित्र छिरेको हुनसक्ने अर्काे आँकलन गरिएको छ । तर, जाली पहिले नै काटिएको जस्तो खिया लागेको छ र झ्यालको धुलो हेर्दा त्यहाँबाट कोही प्रबेश गरेको जस्तो देखिन्छ । घरका अन्य सबै झ्याल ढोका बन्द थिए । जून झ्यालको जाली काटिएको छ, त्यही कोठामा झाकी श्रीमती सुत्ने भएकाले उनले थाहा नपाउनु घटनाको अर्काे रहस्य छ । उमेर र रोगका कारण उनकी श्रीमती कमजोर भएकाले पनि उनले भनेका कतिपय कुरामा प्रहरीले विश्वास गरेको छैन । कसैले प्रहरी अनुसन्धानलाई तोडमोड गराउन पनि झ्यालको जारी काटिएको आँकलन समेत गरिएको छ ।

पहिलो तलाको झ्यालबाट छिर्न पनि कम्तीमा २५ फिट लामो भर्‍याङ प्रयोग गर्नुपर्छ । तर, भर्‍याङ प्रयोग गरिएको कुनै संकेत भेटिन्न । आपँको रुखबाट घरको छतमा जान सक्ने अवस्था छ । तर, छतबाट घरभित्र छिर्ने ढोकामा डबल लक थियो ।

हत्या गर्ने व्यक्तिले झाकै घरको किचनमा रहेको चक्कु प्रयोग गरेका छन् । किचनमा चक्कु राख्ने छुट्टै ड्रयर छ । किचनमा सो ड्रयरमात्र खोलिएकाले पनि घरको बारेमा जानकार नै व्यक्तिले हत्या गरेको हुनसक्ने अनुसन्धानमा आबद्ध प्रहरी अधिकारी बताउँछन् । अर्काेतर्फ छोरा–बुहारी विदेश गएको दोस्रो दिनमा हत्या हुनुले पनि परिचित व्यक्तिको संलग्नताको आधार बलियो छ ।

अर्काेतर्फ झाको कसैसँग दुश्मनी रहेको पनि पत्ता लागेको छैन । बुढानिलकन्ठको जग्गा बेच्ने क्रममा भने उनको केही सामान्य विवाद भएको थियो । त्यसलाई आधार बनाएर पनि प्रहरीले अनुसन्धान गरिरहेको छ ।

हत्या गर्ने व्यक्तिले घरबाट केही लगेका पनि छैनन् । हालसम्म प्रहरीले अनुसन्धानको बाटो नै पत्ता लगाउन सकेको छैन । दुई साता बित्दा पनि ‘हाइप्रोफाइल मर्डर’ पत्ता नलाग्दा प्रहरी अनुसन्धानमाथि दबाब बढ्दै गएको छ । मृतक झाकी छोरीले प्रहरीमा जाहेरी दिइसकेकी छिन् ।

सांसद पालले जाहेरी नै दिइनन्

प्रधानन्यायाधीशमा सिफारिस भएका दीपकराज जोशीको संसदीय सुनुवाइ चलिरहँदा १५ साउनमा एक समूहले नेकपाकी सांसद निरुदेवी पाललाई पेस्तोल देखाएर मोबाइल लुट्यो । साँझ दूध किन्न पसल गएका वेला मोटरसाइकलमा आएका युवकले पेस्तोल देखाई धम्क्याएर मोबाइल लुटेको उनले संसद् सचिवालयमा दिएको उजुरीमा उल्लेख छ ।

अचम्म के छ भने घटनाको अनुसन्धानका लागि उनले अहिलेसम्म प्रहरीमा जाहेरी दिएकी छैनन् । जाहेरी नपरे पनि संसद्मा दिएको सूचनालाई नै आधार बनाएर अनुसन्धान अघि बढाइएको छानबिन टोलीका संयोजक महानगरीय प्रहरी परिसर काठमाडौंका एसपी रामदत्त जोशीले बताए ।

सांसद पालले नै अनुसन्धानमा धेरै चासो नदिएकाले प्रहरीले यो अनुसन्धानलाई गम्भीरताका साथ लिएको छैन । पालले प्रहरीलाई भनेका कुरा र अनुसन्धानका कतिपय प्राविधिक नतिजामा भिन्नता देखिएको छ । स्वीच अफ रहेको मोबाइल लुटिएको उनको भनाई थियो । जून मोबाइल अहिलेसम्म स्वीच अन भएको छैन । जसले अर्काे हाइप्रोफाइल घटनाको अनुसन्धान रहस्यमै अल्झेको छ ।

‘कहिलेकाही अनुसन्धानमा क्लु नहुँदा धेरै नै अध्ययन र विश्लेषण गर्नुपर्ने हुन्छ,’ छानबिन टोलीका एसपी जोशी भने,‘सांसदमाथि धम्काएको घटनालाई गम्भीर रुपमा लिएर अनुसन्धान भइरहेकै छ ।’

साँझको समयमा व्यस्त सडकमा भएको घटनामा प्रत्यक्षदर्शी कोही नहुनु, पेस्तोल देखाएर धम्काउँदा पनि पालले प्रहरीलाई जानकारी नगराउनु, अनुसन्धानमा पीडितले धेरै चासो नदिनुले घटना रहस्यमय बनेको हो ।

महानगरीय प्रहरी आयुक्त डिआइजी मनोज न्यौपाने दुवै घटनालाई प्रहरीले गम्भीरताका साथ लिइ अनुसन्धान गरिरहेको बताउँछन् ।

तपाईको प्रतिक्रिया