माथिल्लो दोर्दी ‘ए’ को ७७ प्रतिशत काम सम्पन्न - Naya Patrika
eNaya Patrika
  • ePaper
logo
Advertisment
SKIP THIS

माथिल्लो दोर्दी ‘ए’ को ७७ प्रतिशत काम सम्पन्न

पूर्वी लमजुङको दोर्दीखोला करिडोरमा निर्माणाधिन अवस्थामा रहेको २५ मेगावाटको माथिल्लो दोर्दी ‘ए’ जलविद्युत आयोजनाको ७७ प्रतिशत निर्माण कार्य सम्पन्न भएको छ । आयोजनाको निर्माण कार्य तिव्र रुपमा भईरहेको लिवर्टी इनर्जी कम्पनी लिमेटेडका सञ्चालक राजेन्द्र वस्तीले बताए ।

उनका अनुसार आयोजनाको पाइप लाइन, सुरुङ र विद्युतको काम अहिले तिव्र रुपमा भएको छ भने बाँधको काम बर्खाको कारण रोकिएको छ । आयोजनका सञ्चालक वस्तीका अनुसार आयोजनाको बाँध क्षेत्रमा ६० प्रतिशत काम सकिएको छ ।

२ हजार ८ सय मिटर लामो पेनेस्टक पाइप लाइनको ९० प्रतिशत बिछ्याउने काम सकिएको छ । आयोजनाको टनेलको काम २ हजार ६ सय २३ मिटरमा २ सय २८ मिटर बाँकी रहेको आयोजनाका साइट प्रोजेक्ट म्यानेजर टेकेन्द्र भण्डारीले बताए । उनका अनुसार टनेलको ९१ प्रतिशत काम सकिएको छ ।

आयोजनामा सुरुङ र पाइप दुबै रहने गरी डिजाइन गरिएको छ । यस्तै, विद्युतगृहमा पनि ५० प्रतिशत निर्माण पूरा भएको छ । १६ महिनामा उत्पादन सुरु गर्ने तालिका भए पनि एक वर्षभित्र काम सम्पन्न गर्ने लक्ष्यसहित निर्माणलाई तीव्रता दिएको कम्पनीको दाबी छ ।

उत्पादन हुने विद्युतगृह नजिकै नेपाल विद्युत प्राधिकरणले निर्माण गर्ने १३२ केभी किर्तिपुर सवस्टेसनमा लगेर जोडिनेछ । २५ मेगावाट क्षमताको लिबर्टी इनर्जी कम्पनी लिमिटेडले ०६९ मा पिपिए सम्पन्न गरेको थियो ।

४ अर्ब लगानीमा निर्माण हुन लागेको यस आयोजनामा नेपाल ईन्भेष्टमेन्ट बैंकको नेतृत्वमा नौ बैंकले लगानी गरेका छन् । आयोजना २०७५ मंसीरमा सक्ने लक्ष्यका साथ काम शुरु भएपनि गत बैशाख १२ को भुकम्प र भारतीय नाकाबन्दीका कारण समस्या परेकाले समय बिस्तारका लागि नेपाल विद्युत प्राधिकरणले एक वर्ष समय थप गरेको आयोजनाका सञ्चालक वस्तीले बताए ।

आयोजनाको कुल ग्रस हेड ३२५ मिटर रहेको छ । आयोजनामा बैंकको ७० प्रतिशत ऋण र ३० प्रतिशत स्वपुँजी लगानी छ । कम्पनीले ०७५ सालको अन्त्यसम्म विद्युत उत्पादन गर्ने लक्ष्य लिएको छ।

दशै पछि शेयर निष्कासन गर्ने
२५ मेगावाटको माथिल्लो दोर्दी ‘ए’ जलविद्युत आयोजनाले दशै पछि शेयर निष्कासन गर्ने भएको छ । आयोजनाका प्रवन्ध निर्देशक डा. आत्माराम घिमिरेले स्थानियसँग समन्वय गरी स्थानियले लगानी गर्न सक्ने समयमा आयोजनाको शेयर निष्कासन गरिने बताए ।

उनका अनुसार आयोजनाले स्थानियलाई १० प्रतिशत र सर्वासाधरणलाई १५ गरी २५ जम्मा प्रतिशत शेयर निष्काशन गरिनेछ । आयोजनाले स्थानियलाई १५ करोड रकम बराबरको १५ लाख कित्ता साधारण शेयर र सर्वसाधरणलाई २२ करोड ५० लाख रुपैया बराबरको २२ लाख ५० हजार कित्ता शेयर निष्काशन गर्ने आयोजनाका प्रबन्धक घिमिरेले बताए ।

तपाईको प्रतिक्रिया