प्रेरक प्रसंग : अमेरिकाबाट दासप्रथा अन्त्य - Naya Patrika
eNaya Patrika
  • ePaper

प्रेरक प्रसंग : अमेरिकाबाट दासप्रथा अन्त्य

अमेरिकाका सोह्रौँ राष्ट्रपति अमेरिकाबाट दासप्रथा अन्त्य गरेकाले मात्रै चर्चित भएका होइनन् । उनी हरेक कोणबाट चर्चायोग्य थिए । उनका हरेक क्रियाकलाप प्रशंसा तथा चर्चाका विषय बन्ने गर्थे ।

एकपटक उनी आफ्नो घोडागाडीबाट कुनै कार्यक्रममा सहभागी बन्न कार्यक्रम आयोजना स्थलतर्फ गइरहेका थिए । उनको अघिपछि सुरक्षाकर्मी पनि घोडामै सवार भएका थिए ।

लिंकन बाटाका दायाँ–बायाँका सुन्दर दृश्यावलोकन गर्दै गइरहेका थिए । बाटामा हिँडिरहेका मानिसले उनलाई अभिवादन गरिरहेका थिए । उनी पनि तिनलाई त्यसैगरी अभिवादन फर्काइरहेका थिए ।

यस्तैमा बाटाको एक छेउमा काम गरिरहेका एक सामान्य मजदुरले उनलाई केही झुकेर अभिवादन गरे । उनको त्यस अभिवादनको जवाफमा अब्राहम लिंकनले पनि त्यसैगरी उनले भन्दा केही बढी नै झुकेर अभिवादन फर्काए ।

राष्ट्रपतिको चाला नजिकबाट देखेका उनका एकजना साथीले पछि कार्यक्रम स्थलमा एकान्त पाउनासाथ उनलाई यस विषयमा प्रश्न गरे । ती साथीले लिंकनलाई सोधे, ‘तपाईंले ती साधारण मजदुरलाई यति धेरै झुकेर किन अभिवादन फर्काउनुभएको हो ?’

साथीको प्रश्न सुनेपछि अब्राहम लिंकन मुसुक्क मुस्कुराए अनि गम्भीर आवाजमा जवाफ दिए, ‘म चाहन्नँ कि नम्रतामा कोही मभन्दा अगाडि जाओस् । त्यसैले मैले उनलाई उनीभन्दा केही बढी नै झुकेर अभिवादन गरेको हुँ ।’

लिंकनको यस्तो जवाफ सुन्दा उनका ती साथीको टाउको श्रद्धाले लिंकनसामु झुक्यो ।

तपाईको प्रतिक्रिया