‘ब्लडमनी’ जुटाउन नसक्दा टोपबहादुरको नेपाल फिर्ती अनिश्चित - Naya Patrika
eNaya Patrika
  • ePaper
logo
Advertisment
SKIP THIS

‘ब्लडमनी’ जुटाउन नसक्दा टोपबहादुरको नेपाल फिर्ती अनिश्चित

थाइल्यान्डका एक नागरिकको मृत्युमा संलग्न रहेको आरोप लागेका टोपबहादुर विक ब्लडमनी तिर्न नसक्दा उनको नेपाल फर्काइ अनिश्चित बन्दै गएको छ । विकलाई युएईको अदालतले हत्या अभियोगमा एक लाख दिराम (२८ लाख नेरु) तिर्नुपर्ने फैसला गरेको थियो । वैदेशिक रोजगार प्रवद्र्धन बोर्डले विकलाई सहयोग गर्न नसकिने भन्दै युएईस्थित नेपाली दूतावासलाई पत्राचार गरेपछि पैसा अभावमा विकको नेपाल फिर्ती अनिश्चित बनेको हो ।

क्रेनबाट लडेर मृत्यु, आरोप विकलाई
विक युएईको अल एनमा रहेको लिमा कन्ट्र्याक्टिङ एलएलसीमा कार्यरत थिए । करिब चार वर्षअघि (२ जुन २०१४) मा काम गर्ने सिलसिलामा क्रेन दुर्घटना भएको हुँदा लडेर दुईजना थाई नागरिकको मृत्यु भएको थियो । सो घटनामा संलग्न भएको भन्दै क्रेन अप्रेटर पाकिस्तानी नागरिक र हेल्परका रूपमा रहेका टोपबहादुरले चार महिना २२ दिन जेलजीवन बिताइसकेका छन् ।

युएईको अदालतले मृतकका परिवारलाई ब्लडमनीस्वरूप चार लाख युएई दिराम दिनुपर्ने फैसला गरेको थियो । जसमध्ये दुई लाख दिराम उनले काम गरेको लिमा कम्पनीले, क्रेन अप्रेटर (पाकिस्तानी नागरिक) र विकले एक–एक लाख (करिब २८ लाख नेपाली रुपैयाँ) दिनुपर्ने फैसला गरेको थियो । सो ब्लडमनी तिर्न नसक्दा विक घर फर्कन पाएका छैनन् ।

कानुनको अभावमा सहयोग गर्न नसक्ने जवाफ
गैरआवासीय नेपाली संघ (एनआरएन), राष्ट्रिय समन्वय परिषद् युएईले अध्यक्ष रमेश श्रेष्ठको संयोजकत्वमा ‘टोपबहादुर सहयोग अभियान’ सुरु गरेको थियो । एनआरएन युएईले नेपाली दूतावासमार्फत नेपाल सरकारलाई अनुरोध गरी ब्लडमनी तिर्न पहल गरे पनि वैदेशिक रोजगार प्रवद्र्धन बोर्डले विद्यमान वैदेशिक रोजगार ऐन र नियमावलीमा ब्लडमनी उपलब्ध गराउने कानुनी व्यवस्था नभएको भन्दै विकलाई सहयोग गर्न नसकिने जानकारी गराएको हो । नेपाली दूतावास अबुधावीका कार्यबाहक राजदुत सागर फुँयालले यसअघि दूतावासले वैदेशिक रोजगार प्रवद्र्धन बोर्डलाई विकको सहयोगका लागि अनुरोध गर्दै पत्राचार गरेकोमा बोर्डले कानुनको अभावमा सहयोग गर्न नसक्ने जवाफ पठाएको बताए ।

विकलाई नेपाल पठाउँछौँ : श्रेष्ठ
एनआरएन युएईका अध्यक्ष रमेश श्रेष्ठले नेपाल सरकार, श्रम तथा रोजगार मन्त्रालयको वैदेशिक रोजगार प्रवद्र्धन बोर्डले विकको उद्धारका लागि आर्थिक सहयोग दिन नसक्ने बताए पनि उनलाई नेपाल पठाएरै छोड्ने बताए । एनआरएन आइसिसीले यसअघि नै विकका लागि ब्लडमनीको १० प्रतिशत (दुई लाख ८० हजार रुपैयाँ) उपलब्ध गराउने निर्णय गरिसकेको छ ।

श्रेष्ठले ब्लडमनी तिर्न नपुग साढे २५ लाख रुपैयाँ युएईमा रहेका संघसंस्था र सर्वसाधारण नेपाली मजदुरबाट चन्दा संकलन गरेर भए पनि विकलाई नेपाल पठाइने बताए । यसअघि एनआरएनको पहलमा अनिस खालिङ राईलाई उद्धार गर्न संकलन गरिएको रकम ‘अनिस खालिङ ट्रस्ट’ स्थापना गरेको बताउँदै त्यहीँको रकमबाट टोपबहादुरलाई उद्धार गर्न आइसिसीसँग पहल गरिने उनको भनाइ छ ।

एनआरएन युएई निवर्तमान अध्यक्ष तथा आइसिसी सदस्य सुदीप कार्कीले यसअघि अनिस खालिङ राईका लागि युएईबाट पठाइएको रकमबाट भए पनि विकलाई सहयोग गर्नुपर्ने बताए । ‘कसैलाई ट्रस्ट बनाउन होइन, जीवन बचाउन चन्दा दिएको हो । पीडितको उद्धारका लागि संकलित रकमको सही सदुपयोग हुनुपर्दछ । उक्त रकम विकको जीवन बचाउन खर्चिनुपर्छ,’ उनले भने ।

तपाईको प्रतिक्रिया