साउदीमा पाहुनाका लागि फेरि खुल्यो ‘सुनौलो जेल’ - Naya Patrika
eNaya Patrika
  • ePaper

साउदीमा पाहुनाका लागि फेरि खुल्यो ‘सुनौलो जेल’

साउदी अरबको राजधानी रियादको यस होटेलमा केही दिनअघिसम्म साउदी राजकुमारहरू, सरकारी कार्यालयमा उच्च पदमा कार्यरत अधिकारी तथा चिरपरिचित व्यापारी, व्यवसायीलाई नजरबन्दमा राखिएको थियो । र, यो आलिसान भवन आफ्ना पाहुनालाई स्वागत गर्नका लागि फेरि एकपटक तयार भएको छ ।

साउदी अरबको भ्रष्टाचारविरोधी अभियानको क्रममा नोभेम्बरमा जुन भव्य होटेलमा दर्जनौँ राजकुमार तथा उच्च अधिकारीलाई राखिएको थियो, त्यसलाई अब सर्वसाधारणका लागि खुला गरिएको छ । रियादको पाँचतारे रिट्ज–कार्लटन होटेलको रिसेप्सन स्टाफले बिबिसीलाई बताएका छन् कि होटेलले अब आममानिसलाई आउनका लागि अनुमति दिइरहेको छ । केहीअघिसम्म यस होटेलमा दुई सयभन्दा बढी राजकुमार, मन्त्री तथा व्यापारीलाई राखिएको थियो ।

सय अर्ब डलर बरामद
जनवरीको अन्त्यसम्ममा साउदी अभियोजक जनरलको कार्यालयले बताएको थियो कि यस भ्रष्टाचारविरोधी कारबाहीपछि सय अर्ब डलर बरामद भएको छ । यो रकम हिरासतमा लिइएका मानिसलाई आर्थिक व्यवस्थापनका रूपमा दिइएको थियो । अभियोजक जनरलको कार्यालयले बताएको थियो कि त्यस समयमा पनि ५६ जना हिरासतमा थिए । त्यहीँ केही रिपोर्टमा भनिँदै छ कि हिरासतमा लिइएका बाँकी मानिसलाई रिट्ज–कार्लटन होटेलबाट जेल पठाइएको छ ।

साउदी अरबमा यो भ्रष्टाचारविरोधी अभियान यहाँका युवराज मोहम्मद बिन सलमानद्वारा सुरु गरिएको थियो । उनीमाथि आफ्ना विरोधीलाई हटाउने र आफ्नो शक्ति बलियो बनाउन यो सब गरेको आरोप पनि लागेको थियो ।

साउदी अरबको भ्रष्टाचारविरोधी अभियानको क्रममा नोभेम्बरमा जुन भव्य होटेलमा दर्जनौँ राजकुमार तथा उच्च अधिकारीलाई राखिएको थियो, त्यसलाई अब सर्वसाधारणका लागि खुला गरिएको छ

युवराजप्रति समर्थन
हिरासतमा लिइएपछि कैयौँ राजकुमार पैसा तिरेर छुटेका थिए । जसमा संसारकै धनी मानिसमध्येका एक राजकुमार अलबलिद बिन तलाल पनि थिए । उनलाई जनवरीको अत्यमा हिरासतबाट मुक्त गरिएको थियो । उनले यसका लागि कति रकम तिरेका थिए भन्नेबारे अहिलेसम्म प्रस्ट जानकारी सार्वजनिक भएको छैन । हिरासतमुक्तिपछि पहिलोपल्ट राजकुमार तलालले समाचार एजेन्सी रोयटर्ससित कुराकानी गर्दै भनेका थिए, उनीमाथि कुनै आरोप लगाइएको थिएन र उनले युवराज मोहम्मद बिन सलमानप्रति पूर्ण समर्थन गरेका छन् । अर्बपति अलबलिद बिन तलालको संसारभरका कैयौँ व्यवसायमा लगानी छ । जसमा ट्विटर र एप्पल जस्ता कम्पनी पनि सामेल छन् ।

शाही परिवारका प्रभावशाली व्यक्ति
नोभेम्बरमा फोब्र्स पत्रिकाले अनुमान लगाएको थियो कि राजकुमार तलालको कुल सम्पत्ति १७ अर्ब डलर छ । जसले उनलाई संसारकै ४५औँ धनी व्यक्तिका रूपमा चिनाउँछ । साउदी अधिकारीका अनुसार उनी अझै पनि आफ्नो कम्पनी ‘किङडम होल्डिङ’का प्रमुखकै रूपमा रहनेछन् । हिरासतबाट जोजो अन्य चर्चित मानिस रिहाइ भएका थिए, तीमध्ये एमबिसी टेलिभिजन नेटवर्कका प्रमुख बलिद अल इब्राहिम र शाही अदालतका पूर्वप्रमुख खालिद अल तुबैजिरी पनि सामेल थिए । हिरासतमा लिइएका शाही परिवारका राजनीतिक रूपमा प्रभावशाली मानिसमा दिवंगत राजा अब्दुल्लाका ६५ वर्षीय एक पुत्र पनि थिए ।

(बिबिसी हिन्दीको समाचार टिप्पणी)
बिबिसी डट कम/हिन्दीबाट

तपाईको प्रतिक्रिया