नक्कली सेयर कारोबार गर्ने ब्रोकरलाई १० लाख जरिवाना - Naya Patrika
eNaya Patrika
  • ePaper

नक्कली सेयर कारोबार गर्ने ब्रोकरलाई १० लाख जरिवाना

नेपाल धितोपत्र बोर्डले चिलिमे जलविद्युत् कम्पनी लि., नेसनल हाइड्रोपावर कम्पनी लि. तथा सानिमा माई हाइड्रोपावर कम्पनी लि.को नक्कली सेयर कारोबार गर्ने ब्रोकर कम्पनी र सञ्चालकलाई कारबाही गरेको छ ।

सम्पत्ति शुद्धीकरण निवारण ऐन तथा धितोपत्रसम्बन्धी ऐनअनुसार सो कम्पनीहरूलाई कारबाही गरिएको बोर्डले जानकारी दिएको छ । बोर्डले चिलिमे हाइड्रोपावर कम्पनीको नक्कली सेयर खरिदबिक्रीमा अग्रवाल सेक्युरिटिज प्रालिलाई तथा नेसनल हाइड्रोपावर कम्पनी लि.को नक्कली सेयर कारोबार भएको सम्बन्धमा श्रीहरि सेक्युरिटिज प्रालिलाई १०–१० लाख रुपैयाँ जरिवाना गरेको छ ।

उनीहरूलाई सम्पत्ति शुद्धीकरणसम्बन्धी ऐनको दफा ७ फ को उपदफा (१) खण्ड (ख) को उल्लंघन गरेकाले सम्पत्ति शुद्धीकरण (मनी लाउन्डरिङ) निवारण ऐन, २०६४ (दोस्रो संशोधनसहित) को दफा ७ फ को खण्ड (ख) बमोजिम कारबाही गरेको बोर्डले जारी गरेको विज्ञप्तिमा उल्लेख छ ।

त्यसैगरी यी दुवै कम्पनीलाई ग्राहकको विवरण सही नराखेको भन्दै ५०–५० हजार जरिवाना गर्ने निर्णय गरेको छ । सेयर खरिद–बिक्रीको झुटो विवरण पेस गर्ने श्रीहरि सेक्यिुरिटी र अग्रवाल सेक्युरिटीका कार्यकारी प्रमुखलाई पनि ५०–५० हजार जरिवाना गर्ने निर्णय धितोपत्र बोर्डले गरेको छ । साथै, सेक्युरिटिज प्रालिलाई पनि ग्राहकको पूर्ण विवरणसहितको अभिलेखमा कमजोरी भएको भन्दै रु. ५० हजार जरिवानासहित सचेत गराएको छ ।

बोर्डले बजार अनुगमन तथा सुपरिवेक्षण कार्यलाई सुदृढ गर्ने उद्देश्यले सम्पत्ति शुद्धीकरण ऐनअन्तर्गत पहिलो कारबाही गरेको हो । यस्ता कारबाहीले सम्पत्ति शुद्धीकरण तथा धितोपत्रसम्बन्धी कसुरको न्यूनीकरण हुने तथा दोस्रो बजार कारोबार थप स्वच्छ र पारदर्शी हुने बोर्डले अपेक्षा गरेको छ ।

तपाईको प्रतिक्रिया